Nuji ewlite'teket Niskam Wa'sok wetkimut

Nqanikuomk wejkuiet, msikuiktuk ika'lut.

Lnui Niskamewit.

Meski'k ansale'wijik ta'n nataknutmi'tij

telintu'tij nutujik, elisink mijua'ji'j,

Klistewit kji-saqamawit.

Me'j mna'q wesa'tanukek ta'n ki's paqtatekiktuk

Weji wuli paqtatek, aq ki's Niskamewiktuk

Sa'q weji Niskamewit.

Mawi msikilk westawu'lk, aq melkiknat sqatu

Teli pajiji ksalnu'k jel nepsa'lan Lnu

Lo'q epune'k nisa'sit.

Ki'l Se'sus ta'n tettuey, kaqama'tawalsewin

aq ta'n teli opliey, ila'tu'n teplo'tasi

ki'l nuji tpluteken.

‍

Wa'so'q tetliqatamn, ki'k eleke'witewey

Tali kisi mknimin, elsaqtek waisisuey

ki'l mesta kisiteken.

Teli ewlamuksian, ki'l teli L'nuamuksin

Menaqanai, menaqanan, natawi ney, elp teleyin

Emteskimk sewiska'tu'n

Tlia'j mu pata'siwun, kesi amaskwipinen

Elue'wuti keska'tu'n, na teli kjipilmin

ta'n tesik, mkamulamun.

Ki'l Kjiniskam wekwisin, kkwis pejili ksaluet

Weji lkimtip ntinin, na nuji wsitawi'wet

Me' pkwatui nenuan.

Ki'l sante'wulamutin, L'nui mjijaqamij

Weji nuka'sit ktinin, to'q Niskam Mijua'ji'j

Me' pkwatui nkesalan

‍